ផ្ទុះការភ្ញាក់ផ្អើល! សូដា នីតា ប្រកាសឈប់ធ្វើការជាមួយ យ៉ែម សំអូន ហើយបោះសម្តីមួយឆ្ងាញ់ឱ្យទៀត

 

នៅថ្ងៃទី ២៩ ខែមីនា ឆ្នាំ ២០២២ នេះ មហាជនអ្នកលេងបណ្តាញសង្គមហ្វេសប៊ុក កំពុងតែផ្ទុះការចាប់អារម្មណ៍យ៉ាងខ្លាំង ក្រោយពីតារាស្រី សូដា នីតា បានបង្ហោះរូបភាពមួយសន្លឹកនឹងតារាចម្រៀង យ៉ែម សំអូន ជាមួយនឹងការប្រកាសក្តែងៗជាសាធារណៈថា នាងសុំបញ្ឈប់រាល់ការងារជាមួយក្រុមតន្ត្រី Dara Entertainment ដែលគេដឹងថាជារបស់លោក យ៉ែម សំអូន ចាប់ពីថ្ងៃនេះ តទៅទៀតហើយ។

សារនោះដែរ អ្នកនាង សូដា នីតា ថែមទាំងបាន Mention ភ្ជាប់នូវក្រុមហ៊ុន ​Dara Entertainment និង ឈ្មោះលោក យ៉ែម សំអូន ដោយរៀបរាប់ថា ៖ «១ សន្លឹកនេះ គឺជាសន្លឹកខ្ញុំផុសចុងក្រោយ ដោយ នាងខ្ញុំសូមប្រកាសរាល់ការងារ Dara Entertainment Samonn Yem គឺនាងខ្ញុំសូមបញ្ឈប់ទាំងអស់។ មនុស្សគ្រប់គ្នាតែងតែចង់បានល្អ កុំចេះតែថាឱ្យគេខុស ១០០ ដង ដោយមិនមានអ្នកមិនហ៊ានតប តែដល់ពេលគេហ៊ានតបតាំងពីក្តៅក្រហាយ! កញ្ចក់អាចឆ្លុះខ្លួន មុខ របស់យើង ពេលដែលយើងត្រូវការ តែភ្នែកមនុស្សគឺជាកញ្ចក់ជាប់នឹងសកម្មភាពរបស់មនុស្សគ្រប់គ្នា! រៀនមើលគេល្អខ្លះផង!»។

ក្រោយពីសារនេះបានផុសជាសាធារណៈ មហាជនអ្នកគាំទ្របានផ្ទុះការចាប់អារម្មណ៍ និង ងឿងឆ្ងល់យ៉ាងខ្លាំងថា តើមានរឿងអ្វីកើតឡើងរវាងលោក យ៉ែម សំអូន ដែលគេស្គាល់ថាជាប្រធាន ​Dara Entertainment និង អ្នកនាង សូដា នីតា ទើបបានជាធ្វើឱ្យអ្នកនាង សូដា នីតា ឈានដល់ការផុសសារបែបនេះឡើង។ ទោះយ៉ាងណា គេក៏មិនទាន់ច្បាស់នៅឡើយទេពីមូលហេតុពិតនៅពីក្រោយការបង្ហោះសារនេះ មានតែរង់ចាំការបកស្រាយពីតារាទាំងពីរនេះប៉ុណ្ណោះ៕