អ្នកលក់ខោអាវអនឡាញសញ្ជាតិថៃម្នាក់ឈ្មោះ Kanittha Thongnak បានទាក់ទាញចំណាប់អារម្មណ៍មហាជនតាមបណ្ដាញសង្គមជាច្រើន ក្រោយរូបនាងបានធ្វើការតុបតែងខ្លួនជាហ្សំប៊ី ឈរឡាយលក់ខោអាវមនុស្សដែលបានស្លាប់ទៅ។
នាង Kanittha អាយុ ៣៤ ឆ្នាំ បានចាប់អារម្មណ៍ថាមហាជនតាមដានការឡាយរបស់នាងគឺមានការកើនឡើង ក្រោយរូបនាងចាប់ផ្ដើមធ្វើការឡាយដោយមានតុបតែងមុខជាខ្មោចគួរឱ្យខ្លាច។ តាមការបញ្ជាក់របស់ស្ត្រីរូបនេះ បានឱ្យដឹងថា នាងចំណាយពេលរហូតដល់ទៅ ៣ ម៉ោងលើការតុបតែងមុខមាត់ខ្មោចហ្សំប៊ីនោះ។
ថ្លែងប្រាប់សារព័ត៌មាន Reuters នាង Kanittha បាននិយាយថា ៖«រាល់ខោអាវទាំងអស់ដែលខ្ញុំលក់គឺជារបស់អ្នកដែលបានស្លាប់ទៅ ដោយមូលហេតុផ្សេងៗគ្នា។ ចាប់តាំងតែពីចាប់ផ្ដើមតុបតែងមុខជាខ្មោចឡាយលក់មក អតិថិជនរបស់ខ្ញុំគឺកើនឡើងដល់ ៥ ទៅ ៦ ពាន់នាក់»។
Kanittha ដែលរៀនការតុបតែងមុខតាមអ៊ីនធឺណែត បានលក់ខោអាវរាប់គិតពីតម្លៃ ១០ បាត ទៅ ១០០ បាត។ នាងចាប់ផ្ដើមមានគំនិតលក់ខោអាវសពនេះ ខណៈពេលដែលនាងទៅចូលរួមពិធីបុណ្យសពគេ ហើយឃើញសម្លៀកបំពាក់សពត្រូវគេដុតចោលតាមប្រពៃណីទំនៀមទម្លាប់។ Kanittha ក៏ចាប់គិតថា បើយកខោអាវទាំងនោះ លក់បន្តគឺប្រសើរជាងការដុតចោលបែបនេះ នាងក៏បាននិយាយជាមួយអាចារ្យសុំខោអាវទាំងនោះ ដើម្បីយកលក់អនឡាញ ហើយប្រាក់ដែលទទួលបានពីការលក់ នាងនឹងចូលជាបច្ច័យទៅវត្តខ្លះ។
បន្ថែមពីនេះទៅទៀត ក្រៅពីលក់ខោអាវសព Kanittha ក៏មានការលក់វត្ថុគួរឱ្យខ្លាចមួយចំនួនផ្សេងទៀត រួមមានទាំងតុក្កតាហ្សំប៊ីជាដើមផងដែរ៕
0 comments:
Post a Comment