កាលពីជំនាន់ឆ្នាំ ១៩៩០ តារាសម្ដែងប្រុស Kwong Wa គឺជាតារាដ៏ល្បីល្បាញខ្លាំងក្លាម្នាក់ប្រចាំហុងកុង។ កើតមកជាមួយរូបរាង និង រូបសម្រស់បានទាំងព្រម Kwong Wa ក៏ចាប់ផ្ដើមមានការស្រឡាញ់លើវិស័យសិល្បៈ។ ក្នុងឆ្នាំ ១៩៨៦ លោកក៏បានចូលរួមថ្នាក់ហ្វឹកហាត់សម្ដែងរបស់ក្រុមហ៊ុន ATV ដោយមិនដល់កន្លះឆ្នាំផង លោកក៏ទទួលបានតំណែងតួឯក។
រហូតដល់ឆ្នាំ ១៩៩៦ តារាសម្ដែងប្រុសមុខមានមន្តស្នេហ៍រូបនេះ ក៏បានផ្លាស់ទៅសម្ដែងឱ្យទូរទស្សន៍ TVB វិញ ដោយពេលនោះគ្រាន់តែចូលភ្លាម លោកក៏ត្រូវបានជ្រើសឱ្យដើរជាតួអង្គ «ថាំងចេង» ប្រចាំខ្សែភាពយន្តភាគហុងកុង «ដំណើរឆ្ពោះទៅលោកខាងលិច» (Journey to the West)។ ពេលនោះហើយ ដែលតារាសម្ដែង Kwong Wa ទទួលបានការសរសើរមិនដាច់ពីមាត់ ថាជាតួថាំងចេងដែលស្រស់សង្ហារជាងគេបំផុត។ គុណបុណ្យគ្រងតំណែងតួអង្គនេះហើយ ដែលធ្វើឱ្យលោកកាន់តែកើនភាពល្បីល្បាញថែមមួយកម្រិតទៀត។
ដោយឡែក ក្រៅពីភាពជោគជ័យលើការងារ បើងាកមើលពីជីវិតឯកជនរបស់តារាប្រុសរូបនេះវិញ លោក Kwong Wa បានរៀបការនឹងតារាចម្រៀងស្រីម្នាក់ឈ្មោះ Connie Mak Kit-man។ ក្រោយចាប់ដៃគ្នាសាងគ្រួសារ តារាជាប្ដីប្រពន្ធមួយគូនេះ ក៏ទទួលបានកូនចំនួន ២ នាក់ជាចំណងដៃផងដែរ។ នៅពេលនោះ ជីវិតរបស់ Kwong Wa អាចនិយាយបានថា រីករាយ និងមានសុភមង្គលជាទីបំផុត ដោយការងារក៏ជោគជ័យ និងមានគ្រួសារដ៏ល្អមួយទៀត។
ទោះជាយ៉ាងណា មានពេលមួយ Kwong Wa បានសម្ដែងរឿងមួយជាមួយនឹងតារារួមអាជីពម្នាក់ឈ្មោះ Sheren Tang ដែលពេលនោះ រូបលោកក៏បានលង់ស្នេហ៍នឹងមិត្តរួមអាជីពរូបនេះ។ តាមព័ត៌មានមួយចំនួនបានចេញផ្សាយថា អំឡុងពេលភរិយាលោកកំពុងពពោះ Kwong Wa បានលួចទៅជួបស្រីស្នេហ៍ញយដង ហើយថែមទាំងត្រូវបានប្រទះឃើញទៅមើលកុនជាមួយគ្នាទៀត។ មិនត្រឹមតែប៉ុណ្ណោះ លោកថែមទាំងស្នាក់នៅផ្ទះស្រីស្នេហ៍រូបនោះរយៈពេល ៦ ថ្ងៃជាប់ៗគ្នាទៀតផង។
ដោយក្ដីស្រឡាញ់ពុះកញ្ជ្រោលបែបនេះ បានធ្វើឱ្យនាង Sheren Tang ជឿជាក់ថា Kwong Wa មិនយូរមិនឆាប់នឹងចាកចេញពីប្រពន្ធលោកមករកនាងជាមិនខាន ប៉ុន្តែអ្វីៗមិនដូចការគិតរបស់នាង នៅពេលភរិយា Kwong Wa ប្រកាសធ្វើសន្និសីទកាសែត។
ក្នុងសន្និសីទនោះ នាង Connie Mak Kit-man មិនសំចៃមាត់បានហៅ Sheren Tang ថាជាស្រីកញ្ជ្រោងដែលទាក់ស្វាមីរបស់នាង ហើយដោយសារតែនាងសម្រេចបំណងខ្លួនមិនបាន ទើបពង្រាយព័ត៌មានអាស្រូវ ដើម្បីបង្ខូចកេរ្តិ៍ឈ្មោះរបស់ប្ដីនាង។ គួរបញ្ជាក់ថា មុននឹងភរិយាលោកធ្វើសន្និសីទកាសែត Kwong Wa ក៏បានចេញមុខបដិសេធរឿងផិតក្បត់នេះដែរ ដោយលោកនិយាយថា លោកគឺជាជនរងគ្រោះ។
ដោយការឈឺចិត្តនឹងគូស្នេហ៍វាយបកវិញបែបនេះ នាង Sheren Tang ក៏បានធ្វើសន្និសីទកាសែតដូចគ្នា ដោយឆ្លើយតបទៅវិញថា នាងគឺជាតារាល្បីឈ្មោះម្នាក់ដែរ ដូច្នេះនាងគឺមិនមែនចាំបាច់ត្រូវពឹងពាក់លើរឿងអាស្រូវស្នេហាជាមួយ Kwong Wa ដើម្បីឱ្យនាងល្បីនោះឡើយ។ នាង Sheren នៅពេលនោះ ថែមទាំងបាននិយាយគំរាមប្ដឹង Kwong Wa និងភរិយាទៅតុលាការថែមទៀតផង។
រឿងរ៉ាវស្នេហាត្រីកោណរវាង Kwong Wa ព្រមទាំងប្រពន្ធ និងស្រីស្នេហ៍បានបង្កការភ្ញាក់ផ្អើលជាខ្លាំងលើវិស័យសិល្បៈហុងកុង ហើយដោយសារតែរឿងអាស្រូវមួយនេះហើយ បានធ្វើឱ្យកេរ្តិ៍ឈ្មោះរបស់លោកត្រូវបានបំផ្លាញរហូតដល់សព្វថ្ងៃនេះ៕
0 comments:
Post a Comment