នៅរសៀលថ្ងៃទី ២៤ ខែមីនា ឆ្នាំ ២០២២ នេះ តាមរយៈផេកផ្លូវការ ឧកញ៉ា ខេមរៈ សេរីមន្ត បានបង្ហោះពីសកម្មភាពក្មេងប្រុសកម្សត់លក់លៀសហាល ដែលផ្ទុះការចាប់អារម្មណ៍លើបណ្ដាញសង្គម បានចូលជួបជាមួយលោកឧកញ៉ា ដែលក្នុងនោះលោកបានប្រគល់ថវិការឧបត្ថម្ភចំនួន ២ លានរៀល និង បានបញ្ជាក់សារឱ្យបានដឹងថា ៖ «ស្រឡាញ់ប្អូនត្រង់ចេះតស៊ូហ្នឹង ការតស៊ូពិតប្រាកដ ភាពស្មោះត្រង់ ថែមទាំងប្រឹងរៀនឱ្យពូកែទៀត អនាគតទៅប្អូននឹងជោគជ័យ។ ថវិកា 2 000 000 រៀលនេះ ជាការលើកទឹកចិត្តដល់ប្អូន»។
គួររំឭកផងដែរថា ទាក់ទិនទៅនឹងរឿងប្អូនប្រុស កាលពីថ្ងៃទី ២២ ខែមីនា ឆ្នាំ ២០២២ កន្លងទៅ មហាជននៅក្នុងបណ្ដាញសង្គមហ្វេសប៊ុក និង Tiktok បាននាំគ្នាផ្ទុះការចាប់អារម្មណ៍ សម្ដែងក្ដីរំជួលចិត្ត អាណិតក្មេងប្រុសលក់លៀសហាលខាងលើ ដែលបានអង្គុយដោយក្ដីអស់សង្ឃឹម ក្រោយភ្លៀងធ្លាក់ទទឹករទេះលៀសហាលអស់ គួរឱ្យអាណិតអាសូរ។
ទន្ទឹមនឹងនោះ នៅថ្ងៃខែឆ្នាំដដែល តាមរយៈផេកផ្លូវការឧកញ៉ា ក៏ដូចជាតារាចម្រៀង លោក ខេមរៈ សេរីមន្ត បានប្រកាសរកដំណឹងពីក្មេងប្រុស ដើម្បីផ្ដល់ជំនួយដោយបានបញ្ជាក់ថា ៖ «មានបងប្អូនណាស្គាល់ផ្ទះ ឬ លេខទូរស័ព្ទប្អូនម្នាក់នេះទេ ខ្ញុំពេញចិត្តការតស៊ូរបស់គាត់ចង់ជួយគាត់»៕
0 comments:
Post a Comment